Nehemiah

11Лава Неемиёскирэ саво исын чяво Ахалиёско. Адава исыс до чён саво кхарэлпэ кислево до бишто бэрш, мэ исыс до форо Сузы, 2и явья Ханано екх мирэ пшалэндыр, и лэса мануша Иудеятыр. И мэ пучявас лэндыр пал иудеендэ савэ зракхнэпэ, пленостыр, и пал Иерусалмо.

3И ёне пхэндэ мангэ: "Иудеи савэ зракхнэпэ пленостыр ачнэпэ дэ Иудея, ― энё дживэн до пхарипэн и до баро ладжяипэн. И стены фороскирэ розмардэ и вудара лакирэ схачкирдэ ягаса".

4И сыр мэ шундём адалэ лава, бэстём и лыём тэ ровав, явнэ пэ мандэ пхарэ дэвэса, и мэ до посто мангаваспэ ангил Дэвлэстэ, 5и ракиравас: "О Яхвэ, Дэвэл болыбнытко, Ту баро, и Ту зрикирэс Пэскирэ лава и камлыпэн саво Ту дыян одолэнгэ кон камэл Тут и шунэл заповеди Тырэ!

6Мангам Тут, прычив Тырэ кана кэ мэ и откэр якха Тырэ пэ мандэ, соб тэ шунэс мангипэн Тырэ слугаско, саво мангэлпэ Тукэ ангил Тыро муй дадывэс, дэвэс и рат, пал Израильсконэндэ чявэндэ, савэ исын Тырэ рабы и мангав пал лэнгирэ бэзэха, савэ амэ кэрдям ангил Тутэ. И мэ пэскирэнса дадэнса — кэрдям бэзэх. 7Дрыван нанэ куч амэ кэрдям ангил Тутэ, и на зракхьям заповеди, и Тырэ лава, и сыр тэ живас ангил Тутэ, сыр Ту пхэндян Маисеёскэ Тырэскэ рабоскэ.

8Мангав Тут, зрипир лав, саво Ту пхэндян Моисеёскэ, Тырэскэ рабоскэ: ‘ Сыр тумэ на авэна чячунэ Мангэ, Мэ розчурдава тумэн машкир сарэндэ манушэндэ. 9Нэ сыр тумэ обрисёна кэ Мэ и лэна тэ ракхэн лава Мирэ и тэ дживэн пир лэндэ, и сыр тумэ авэна пир саро свэто розчурдымэ, и оддотхыр Мэ скэдава тумэн и янава пэ штэто, саво Мэ выкэдыём, соб тэ уджинэн одой лав Миро‘.

10И ёнэ Тырэ рабы и мануша Тырэ, савэн Ту выкиндян барэ зорьяса и Тырэ зоралэса вастэса. 11Дэвэл миро! Мангав Тут, прычив Тырэ кана ко мангипэн тырэ рабоско и ко мангипэн Тырэ рабэнго, савэ лошалэ одолэса, со дарэн ангил Тутэ. Мангав Тут благослови ман дадывэс, и дэ мангэ милость ангил адаластэ манушестэ!" Мэ исыс одова кон подэл вино царёскэ.

21И исыс: до чён нисано до бишто бэрш сыр сыс царё Артаксерксо и вино сыс тэрдо ангил лэстэ. Мэ лыём адава вино и подыём царёскэ. И миро муй на сыс обмэкло ангил лэстэ. 2И пхэндя мангэ царё: "Соскэ обмэкло тыро муй, ту назанасвалыян? Мэ дыкхав со пхарипэн пэ ило тыро". И мэ дрыван здарандыём.

3И мэ пхэндям царёскэ: "Царё тэ авэс зорало! Сыр мангэ тэ на авав обмэклэ муеса, сыр форо — кай гарадэ мирэ дада розмардо, и вудара лэскирэ схачкирдэ ягаса?"

4И пхэндя мангэ царё: "Со ту мангэс тэ кэрав ваш тукэ?" и помангьёмпэ болыбнытконэ Дэвлэскэ 5и пхэндём царёскэ: "Сыр чялыя царёскэ рабо тыро и ёв попэя лачипэн ангил царёстэ и царё закамэла мэк бичявэл ман дэ Иудея, до форо кай гарадэ мирэ дада, и мэ скэрэва лэс". 6И пхэндя мангэ царё и царица бэшты сыс паш лэстэ: "Бут дэвэса авэла дром тыро и коли ту рисёса?" И чялыя адава царёскэ, и ёв бичявдя ман, и мэ пхэндём дэ саво дэвэс мэ традава.

7И мэ пхэндём царёскэ: "Сыр царё скамэла и пхэнэла, тэ дэн мангэ лыла ваш шэралэнгэ савэ до форы пал рэка, соб ёнэ тэ промэкэн ман кэ одова сыр мэ авава дэ Иудея, 8и лыл Асафоскэ, саво ракхэл вэша царёскирэ, соб ёв тэ дэл мангэ вэш тэ обмарав вудара, ваш Кхэр и ваш стены форытка и ваш кхэр, дэ саво мэ заджява". И дыя мангэ царё, саро со мэ мангьём пал одово со Дэвлэскиро васт исыс пэ мандэ.

9И мэ явьём ко шэралэ форытка савэ пал рэка, и подыём лэнгэ лыла царёстыр. И царё бичявдя манца барэн раен и манушэн пэ грэндэ. 10И шундэ хоронитянино Санаваллато и аммонитско бутярно Товиё, и захая лэн дрыван бари холы, со явья мануш тэ родэл лачипэн чявэнгэ Израилёскирэнгэ.

11Мэ явьём до Иерусалимо, и исыс одой трин дэвэс, 12мэ вштыём ратяко — и манца нанэ бут мануша — и мэ на пхэндём ни конэскэ, со дыя Дэвэл мангэ до ило миро тэ кэрав ваш Иерусалимо. И ското на исыс манца, екх грай пэ савэстэ мэ традавас.

13И мэ вытрадыём ратёко до вудара Долинакирэ, ангил источнико Драконоско, и кэ вудара дэ савэ вылыджянас навозо, обдыкхьям стены Иерусалимоскирэ, савэ исыс розмардэ, и вудара савэ исыс схачкирдэ ягаса. 14И мэ протрадыём кэ вудара пашил источнико и кэ ставко царёскиро, и на исыс штэто, соб тэ проджял грай пэ савэстэ мэ традавас.

15И мэ гадыёмпэ пир далина ратякэс, и роздыкхём стена, и рисиём и палэ до вудара Долинакирэ. 16Шэралэ на джиндэ дур мэ пхиравас и со кэравас. И иудиенгэ, и рашаенгэ, и барэ манушэнгэ, и шэралэнгэ, и авирэнгэ, кон кэрэл буты, мэ нисо на роспхэндём.

17И мэ пхэндём лэнгэ: "Тумэ дыкхэн дэ саво амэ пхарипэн, со Иерусалимо розмардо, и вудара лэскирэ схачкирдэ ягаса. Авэнте и гадаса стены Иерусалимоскирэ, и на аваса до лажяипэн!" 18И мэ розпхэндём лэнгэ сыр Дэвлэскиро васт исыс пэ мандэ, и пал лава царёскирэ, савэ ёв пхэндя мангэ. И ёнэ пхэндэ: "Вштаса и ласа тэ кэрас!" И ёнэ подрикирдэ васта пэскирэ по лачипэн.

19И шундэ адава хоронитянино Санаваллато и аммонитско бутярно Товиё, и аравитянино Гешемо, и лынэ тэ санпэ амэндыр, и тэ ракирэн: "Со за рындо адава, саво тумэ кэрэн? Со тумэ гадэнпэ пэ царёстэ"? 20И мэ пхэндём лэнгэ лавэса дякэ: "Дэвэл болыбнытко Ёв дэла амэнгэ лачипэн, и амэ Лэскирэ слуги, вштаса и ласа тэ кэрас, а тумэнгэ нанэ кэ адава ни саво рындо, со кэрэлпэ до Иерусалимо".

31И вштыя Елияшиво, Рашай баро, и лэскирэ пшала рашая, и лынэ тэ кэрэн Бакранэ вудара — ёнэ свэнциндэ лэн и чивдэ вудара по штэто и кэ башня Меа свэнциндэ лэн, кэ башня Хананела. 2И пашил лэндэ кэрэнас мануша Иерихоностыр, а пашил лэндэ кэрэлас Закхуро, чяво Имриёско.

3А вудара Мачитка кэрэнас чявэ Сенаёскирэ, ёнэ обмардэ лэн пхаленса и чивдэ вудара лэнгирэ, чивдэ клыдына и засовы. 4И пашил лэндэ кэрэлас Меремофо, чяво Уриёско, Чявэско Гаккоцоско. А пашил лэндэ кэрэлас Мешулламо, чяво Берехиёско, чявэско Мешизабеласко. И пашил лэстэ кэрэлас Садоко, чяво Бааноско. 5Пашил лэндэ кэрэлас фэкойцэндыр. Нэ барэ мануша на порискирдэ пэскири мэн, соб тэкэрэн буты шэралэнса пэскирэнса.

6А вудара Пуранэ кэрэнас Иоаидо, чяво Пасеахаёско, и Мешулламо, чяво Бесодиёско. Ёнё обмардэ лэн пхаленса и чивдэ пэ вудара клыдына и засовы. 7И пашил лэндэ кэрэнас гаваонитянино Мелатиё и меронофиянино Иадоно, мануша Гаваоноскирэ и Мицфаскирэ, кэ кхэра шэралэнгирэ савэ пал рэка.

8Пашил лэстэ кэрэлас Уззиило, чяво Харгаиё ёв исыс ювилиро. И пашил лэстэ кэрэлас Хананиё, чяво парфюмероско. И ёнэ кэрэнас до Иерусалимо кэ буглы стена. 9И пашил лэндэ кэрэлас Рефаиё, чяво Ораско, ёв исыс шэрало по паш Иерусалимо. 10И пашил лэндэ кэрэлас и дживэлас Иедаиё, чяво Харумафоско, а пашил лэстэ кэрэлас Хаттушо, чяво Хашавниёско.

11Пэ авир штэто кэрэнас Малхиё, чяво Харимоскиро, и Хашшуво, чяво Пахав- Моавоскиро, башня Бовытко. 12И пашил лэстэ кэрэлас Шаллумо, чяво Галлхешоско, и лэскирэ чяя, ёв исыс шэралэса пэ паш Иерусалимо.

13Вудара Долинакирэ кэрэнас Хануно и мануша Заноахостыр — ёнэ кэрдэ лэн, клыдынэнса и засовэнса и чивдэ по штэто и адякэш кэрдэ стена варикай панджшэл метры – кэ вудара дэ савэ вылыджянас Навозо.

14А Навозна вудара кэрэлас Малхиё, чяво Рехавоско, шэрало дэ Беф- Каремо. Ёв кэрдя лэн и чивдя по штэто и чивдя клыдына и засовы лэнгирэ. 15А вудара Источникостыр кэрэлас Шаллумо, чяво Колхозеёско, шэрало дэ Мицфа – ёв кэрдя лэн обмардя и чивдя клыдына и засовы – адякэж стена пашил ставко Селахо, кай садо царёско и кэ ступеньки, савэ лыджян форостыр Давидоскирэстыр.

16Пал лэстэ кэрэлас Неемия, чяво Азбукоско, ёв шэрало сыс дэ Беф- Цуро, кэ форо кай гарадо Давидо, и ко ставко саво кэрдэ зоралэ мануша. 17Пал лэстэ кэрэнас левиты: Рехумо, чяво Ваниёско, а пашил лэстэ кэрэлас Хашавиё, ёв исыс шэрало дэ паш форо Кеило.

18Пал лэстэ кэрэнас пшала лэнгирэ: Бавваё, чяво Хенададоско, ёв исыс шэрало пэ авир паш боко Кеило. 19Пашил лэстэ кэрэлас Езеро, чяво Иисусоско, шэрало дэ Мицфо — пэ авир штэто, сыр тэ гадэпэ упрэ кай гаравэнас сарэ чурья савэнса марэнаспэ и кэ угло.

20Пал лэстэ кэрэлас Варухо, чяво Забваёско, пэ авир штэто углостыр и ко кхэр Елияшивоско, барэ рашаеско. 21Пал лэстэ кэрэлас Меремофо, чяво Уриёско, чявэско Гаккоцоско ёв кэрэлас пэ авир штэто пир саро кхэр Елияшивоско.

22А пал лэстэ кэрэнас рашая, савэ дживэнас пашил Иерусалимо. 23Пал лэндэ кэрэнас Вениамино и Хашшуво ангил пэскиро кхэр. Пал лэндэ кэрэлас Азариё, чяво Маасеёско, чявэско Ананиёско, пашил пэскиро кхэр. 24Пал лэндэ кэрэлас Биннуё, чяво Хенададоско, пэ авир штэто, кхэрэстыр Азариёскирэстыр кэ угло и кэ поворото.

25Фалало, чяво Узаёско, кэрэлас ангил угло и башня, сави исыс вучедыр упратунэстыр кхрэстыр царёскирэстыр, сави пашил дворо бэшибнытко. Пал лэстэ Федаиё, чяво Парошоско. 26И нефенеи савэ дживэнас до Офело, по штэто ангил Панытка вудара кэ востоко и кэ вучи башня. 27Пал лэстэ кэрэнас фекойцы, пэ авир штэто, ангил барьятыр и вуче башнятыр и ко стены Офелоскирэ.

28Пал вудара Грытка кэрэнас рашая, кажно ангил пэско кхэр. 29Пал лэндэ кэрэлас Садоко, чяво Иммероско, ангил пэскиро кхэр, а пал лэстэ кэрэлас Шемаиё, чяво Шеханиёско, саво ракхэлас вудара Восточна. 30Пал лэндэ кэрэлас Хананиё, чяво Шэлемиоско, и Хануно, шовто чяво Цалафоско, пэ авир штэто. Пал лэстэ кэрэлас Мешулламо, чяво Берехиоско, ангил кхэр кай ёв дживэл.

31Пал лэндэ кэрэлас Малхиё, чяво ювилироскиро, ко кхэр нефинеевэнго и мануша савэ кинэн и бикнэн, ангил вудара Мифкадоскирэ и кэ упратуно кхэр саво пэ угло. 32А машкир упратуно кхэр и кэ вудара Бакрытка кэрэнас мануша савэ залэнаспэ сумнакаса и кэ мануша савэ кинэнас и бикнэнас.

41И сыр шундя Санаваллато, со амэ гадас форытко стена тэнче росхолясыя ёв, розгияпкэ дрыван, и саласпэ иудеендыр, 2и ракирэлас ангил сарэндэ шэралэндэ и раендэ дэ Самария и пхэндя: "Со кэрэн адалэ бизорьякирэ иудеи? Кон лэнгэ дэла тэ докэрэн адалэ стены? Хиба ёнэ лэна тэ янэн жэртвы? Чи дадывэс ёнэ докэрэна адая буты? Хиба бара кокорэ вштэна савэ розмардэ и схачкирдэ ягаса?" 3И аммонитянино Товия исыс пашил лэстэ и ракирэлас: "Адая стена сави ёнэ кэрэн адалэндыр барэндыр, — роспэрлапэ по котыра сыр заджяла пэ латэ лисица!"

4Дэвэл амаро пошун амэн, ёнэ санпэ амэндыр, кэр адякэ, соб лэнгиро сабэн тэ обрисёл пэ лэнгиро шэро и лэнгирэ враги тэ залэн лэн до плено! 5И на закэр якха пэ бангипэн лэнгиро, и бэзэха лэнгирэ мэк авэна ангил Тутэ, пал одова, со авир мануша холясон пэ манушэндэ савэ гадэн стены! 6И амэ гадасас стена дурэдыр, и гадыям сари кэ паш, и манушэнгирэ илэ хачёнас тэ кэрэн дурэдыр.

7И сыр шундэ Санавалато, и Товия, и аравитяни, и аммонитяни, и азотяни, со гадэнпэ стены до Иерусамило, саро со исыс розмардо ёнэ скэрэн, адава лэн дрыван розхолякирдя, 8и зракирдэпэ сарэ ёнэ тэ джян тэ марэнпэ пэ Иерусалимо и тэ розмарэн лэс. 9И амэ мангасаспэ амарэ Дэвлэскэ, и чивавас манушэн тэ ракхэн амэн дэвэс и рат лэндыр.

10И пхэндя Иуда: "Нанэ зор ко мануша савэ подлыджян бара, а прахо бут, и амэ на докэраса стена". 11И пхэндэ амарэ враги: "На уджинэна ёнэ и на удыкхэна, сыр амэ аваса машкир лэндэ и умараса лэн, и тэрдякираса сари буты".

12И сыр явнэ иудеи, савэ дживэнас пашил лэндэ, то ракирэнас амэнгэ дэш молы: "Дэ сарэ штэты кай тумэ на дэнапэ, ёнэ лэна тэ джян пэ тумэндэ". 13И мэ чивдём пэ тэлунэ штэты пал стена, и дэ откэрдэ штэты, манушэн родэндыр, меченса, копьенса, и лукэнса. 14Сыр мэ саро обдыкхьём, скэдыём барэн и шэралэн и авирэн манушэн и пхэндём лэнгэ: "Надарэн лэндыр! Зрипирэн Дэвлэс, саво исын баро и зорало! И марэнпэ пал пшалэндэ, пал чявэндэ и чяендэ тумарэндэ, пал ромнендэ и тумарэ кхэра!"

15И сыр шундэ амарэ враги, со амэ саро уджиндям, и Дэвэл розмардя саро, со ёнэ камнэ тэ кэрэн, и амэ рисиям кэ стена кэ пэскири буты. 16И одолэстыр дэвэсэстыр: паш амарэ тэрнэ мануша кэрэнас буты, а паш лэндыр рикирэнас копья, щиты, луки, и доспэхи. И шэралэ дыкхэнас пал саро кхэр Иудаско.

1718Сарэ кон кэрэлас стэна и пхари буты: екхэса вастеса кэрэлас пэскири буты, а авир васт рикирэлас мечё. Кэ сарэ кон кэрэлас буты исыс припхандо мечё пэ лэстэ, и адякэ ёнэ кэрэнас. И мануш саво башавэл дэ бакрытко рого исыс паш мандэ.

19И мэ пхэндём барэ манушэнгэ, и шэралэнгэ, и сарэнгэ манушэнгэ: "Буты дрыван бари, и амэ розчурдымэ пир сари стена дур екх- екхэстыр. 20Дэ саво штэто, шунэна сыр забашавэла бакрытко рого, одорик зжянпэ сарэ кэ амэ. Дэвэл амаро лэла тэ марэлпэ пал амэндэ".

21И амэ кэрасас адая буты, и паш мануша рикирэнас пэскирэ мэчи сыр вштэл кхам и кэ чэргэня. 22Дякэж мэ пхэндём манушэнгэ: "Сарэ пэскирэ слугэнса авэна тэ раткирэн машкир Иерусалимо, лэна ёнэ ратякэс тэ ракхэн, а дэвэсэ тэ кэрэн буты". 23И ни мэ, ни пшала мирэ, ни слуги мирэ, ни мануша савэ ракхэнас, ни савэ пал мандэ, – амэ на злыям амари идя, никон и паш сарэндэ исыс мечо и паны.

51И исыс бари годла машкир манушэндэ и джювлендэ пэ пшалэндэ пэскирэндэ иудеендэ. 2И исыс адасавэ, савэ ракирнас: "Чявэн амарэн и чяен амарэн – амэн бут. И амэ дорэсас маро, хас и дживас!" 3И исыс адасавэ савэ ракирэнас: "Маля амарэ, и виноградники амарэ, и кхэра амарэ амэ зачивас до бангипэн, соб амэнгэ тэ лас маро сыр нанэ со тэхас".

4И исыс мануша савэ ракирэнас: "Амэ лыям руп тэ покинас налого царёскэ, пал амарэ маля и виноградники амарэ. 5И амэ адасавэ – сыр амарэ пшала, и чявэ амарэ — адасавэ сыр и лэнгирэ чявэ. И гэна амэ отдас амарэн чявэн и чяен амарэн до бутярнэ, и исын чяя савэн залынэ, и нанэ соса тэ покинас, и амарэ маля, и виноградники амарэ кэ ёнэ".

6И мэ дрыван росхолясыём, сыр шундём годла и лава адалэ. 7И захачия ило миро дэ мандэ, и мэ выпхэндём барэ манушэнгэ, и шэралангэ, адасавэ лава: "Тумэ лэн пэскирэндыр пшалэндыр проценты!" И мэ скэдыём пэ лэндэ бутэн манушэн. 8И лыём тэ ракирав: "Амэ выкинасас кицык исыс зор, амарэн пшалэн, иудеен, савэ исыс бикиндэ авирэнгэ манушэнгэ. А кана тумэ бикнэн тумарэн пшалэн, и ёнэ бикнэнпэ амэнгэ?" И ёнэ исыс штыл, и на попэрэнас ни савэ лава.

9И мэ пхэндём: "Нанэ куч тумэ кэрэн адава. Хиба нанэ дэ бари дар Дэвлэски тумэ трэби тэ дживэн, соб тэ на санпэ тумэндыр амарэ враги? 10Мэ и мирэ пшала, и бутярнэ мирэ дас до бангипэн лэнгэ руп и маро. Мангав тумэн, на гинэн бангипэн лэнгиро! 11Мангав тумэн рискирэн дэ адава дэвэс маля лэнгирэ, виноградники лэнгирэ, оливкова сады лэнгирэ, и кхэра лэнгирэ, и руп и маро, и вино, и ксил савэ тумэ лэнас лэндыр".

12И пхэндэ ёнэ: "Амэ отдаса, и наласа тэ мангас лэндыр. Амэ кэраса адякэ сыр ту ракирэс". И мэ кхардём рашаен, и пхэндём мэк солахан, со ёнэ кэрэна саро со пхэндэ. 13И тенчэ мэ чурдыём прахо и пхэндём: "Дякэ мэк Дэвэл розчурдэл прахоса одолэс манушэс, саво на зрикирэла адава лав, и лэскиро кхэр и лэскири буты джяла саро прахоса". И пхэндэ сарэ мануша: "Аминь". И прославиндэ Яхвэ. И кэрдэ мануша адава со пхэндэ.

14И одолэстыр дэвэсэстыр, сыр чивдэ ман шэралэса пир саро форо Иудаско, биштонэ бэршэстыр и ко трянда дуйто бэрш сыр исыс царё Артаксерксо, дэшудуй бэрша мэ и мирэ пшала на ханэ маро шэралэско адалэ фороско. 15А шэралэ савэ исыс ангил мандэ, рикирэнас манушэн до пхарипэн, и лэнас лэндыр маро и вино и саранда рупунэ ловэ. И шэралэнгирэ бутярнэ исыс хулаенса пэ манушэндэ, а мэ на кэравас адякэ, пал одова со даравас ангил Дэвлэстэ.

16А дякэж буты пэ стена мэ подрикиравас сарэстыр илэстыр. И маля амэ на кинасас. И сарэ бутярнэ мирэ скэдэнаспэ пэ буты. 17И иудеен и шэралэн пал миро скаминт исыс шэл пандждэша манушэн авэнас одолэнса манушэнса, савэ дживэнас пашил амэндэ.

18И гэна со подэнас пэ екх дэвэс: екх гурув, выкэдымэ шов бакрэ, и птица ваш мангэ, пал дэш дэвэс бут вино. И маро кэ шэрало фороскиро мэ на мангавас пал одова, со пхари буты исыс кэ мануша адалэ. 19Зрипир мангэ, Дэвэл миро, пэ лачипэн, саро мэ кэрдём ваш адалэнгэ манушэнгэ.

61И сыр шундя адава Санаваллато, и Товия, и аравитяно Гешэмо, и авирта амарэ враги, со гадыям стена и ёй нанэ розмарды — нэ дэ одова дэвэс на исыс тэрдэ вудара по пэско штэто, — 2тэнче бичявдя Санаваллато и Гешэмо кэ мэ лава: "Яв и дыкхасапэ туса дэ гав пэ мал Она". Ёнэ камнэ тэ кэрэн мангэ бида.

3И мэ бичявдём кэ ёнэ манушэн, тэ пхэнэн лэнгэ: "Бари буты кэрав мэ и на ачявава ла, соб тэ явав кэ тумэ. Палсо тэ ачявав адая буты и тэ явав кэ тумэ?" 4И ёнэ бичявэнас кэмэ штар молы адалэ лава, нэ мэ исыс тэрдо пэ пэскиро лав.

5И бичявдя Санаваллато кэ мэ пэскирэс бутярнэс адалэнса лавенса панджчто моло и кэ ёв до васта исыс откэрдо лыл. 6Дэ саво исыс чиндо: "Мануша ракирэн, и Гешэмо подрикирэл, со ту и иудеи камэн тэ гадэнпэ пэ царёстэ, и пал адава кэрес стена, и ту камэс тэ авэс кокоро царёса.

7А дякэж пророкэн чивдян тэ ракирэн пал тутэ дэ Иерусалимо адасавэ лава: ‘Дэ Иудея исын царё!‘ И адалэ лава шунэла царё. И ту акана яв поракираса туса".

8И мэ бичявдём кэ ёв адасавэнса лавэнса: "На исыс адасаво сыр ту ракирэс. Нэ ту ракирэс хохаибэн пэскирэстыр илэстыр". 9Пал адава, со сарэ ёнэ даравэнас амэн и ракирэнас: "Пирьячена тэ кэрэн адая буты, и стена на докэрэна". А кана Дэвла подрикир васта амарэ!

10И мэ явьём ко кхэр кэ Шэмаиё, чяво Делаиёско, чявэско Мегетавелоско, и кхэр исыс закэрдо. И ёв пхэндя: "Дыкхасапэ до Кхэр Дэвлэско, машкир Кхэр, и закэраса вудара Кхэрэскирэ, пал адава, со явэна тэ умарэн тут". 11И мэ пхэндём: "Чи лэла тэ нашэл адасаво мануш сыр мэ? И кон мэ адасаво, соб тэ гарававпэ дэ Дэвлэскиро Кхэр и тэ ачявпэ джидо? Мэ адава на кэрава!"

12И мэ полыём, со нанэ Дэвэл бичявдя Шэмаёс пал одава, со ёв ракирэлас нанэ пал мандэ, и Товия и Санаваллато подкиндэ лэс. 13Ваш одова ёнэ подкиндэ лэс, соб мэ тэ здарандёвав, тэ кэрав сыр ёнэ ракирэнас и тэ кэрав бэзэх. Ёнэ адалэса камэнас бы тэ ладжякирэн ман ангил манушэндэ. 14Зрипир, Дэвла, Товиёс и Санаваллатос, пир лэнгирэ рынды, и адякэж пророчитса Ноадия и авирэн пророкэн, савэ даравэнас ман!

15И исыс докэрды стена дэ бишто панджто элула, пал пандждэша дуй дэвэса. 16И сыр шундэ сарэ амарэ враги и удыкхнэ сарэ мануша, савэ дживэнас пашил амэндэ, кэрдяпэ лэнгэ ладжяво. И полынэ, со Дэвлэскиро васт исыс амэнса дэ адая буты.

17Дэ одолэ дэвэса барэ мануша Иудейска чинэнас бут лыла и бичявэнас ко Товиё, а одолэ савэ Товиёстыр, Явэнас кэ ёнэ. 18Пал одова со бут мануша Иудейска, солаханас тэ авэн чячунэ лэскэ, пал одова со ёв джямутро Шеханиёско, чявэско Арахоско, а Иоханано, чяво лэско, лыя чяя Мешулламоскирья, саво исыс чяво Верехоско. 19Дякэж пал лэскирэ лаче рынды ёнэ ракирэнас ангил мандэ, и мирэ лава ёнэ пирипхэнэнас лэскэ. Товиё бичявэлас лыла тэ даравэл ман.

71И сыр исыс скэрды стена, и мэ чивдём вудара, и исыс чивдэ мануша тэ ракхэн вудара, и тэ багэн, и исыс чивдэ левиты. 2И мэ чивдём шэралэса Хананиёс, пшалэс мирэс, до Иерусалимо, и Хананиёс шэралэса дэ крепость. Пал одова, со ёв исыс мануш патывало и дарэлас Дэвлэстыр.

3И мэ пхэндём лэнгэ: "Мэк на откэрэн вудара Иерусалимоскирэ кэ одова сыр на вштэла кхам. Исыр ёнэ тэрдэ мэк закэрэн и чивэн лэн по засовы. И чивэн манушэн тэ ракхэн Иерусалимо, кожно мэк ракхэл ангил пэскиро кхэр". 4Форо исыс скэрдо баро, а манушэн до форо дживэлас нанэ бут, и на исыс скэрдэ кхэра.

5И Дэвэл чивдя мангэ по ило, и мэ скэдыём барэн раен, и шэралэн, и сарэн манушэн, соб тэ зачинэн кон савэ родостыр. И попэём лыл дэ саво исыс зачиндо кон савэ родостыр и кон рисия перво пленостыр до Иерусалимо:

6"И гэна чявэ Иудеятыр, савэ рисинэ пленостыр, сыр залыя лэн Навуходоносоро, царё Вавилонско, и ёнэ рисинэ до Иерусалимо и дэ Иудея, дэ пэскирэ форы, 7рисинэ Зоровавелёса, Иисусоса, Неемиёса, Азариёса, Рааиёса, Нахманиёса, Мардахеёса, Билшаноса, Мисферефомоса, Бигваёса, Нехумоёса, Вааноёса. Бут муршэн Израилёскирэ.

8Чявэн Парошоскирэн дуй баря шэл ефтадэша дуй. 9Чявэн Сафатиёскирэн триншэла ефтадэша дуй. 10Чявэн Арахоскирэн шовшэла пандждэша дуй.

11Чявэн Пахаф- Моавоскирэн чявэндыр Иисусоскирэн и Иоавоскирэн дуй баря охтошэла дэшохто. 12Чявэн Еламоскирэн бари буйшэла пандждэша штар. 13Чявэн Заттуноскирэн охтошэла саранда пандж. 14Чявэн Закхаёскирэн ефташэла шовдэша.

15Чявэн Биннуёскирэн шовшэла саранда охто. 16Чявэн Беваёскирэн шовшэла дуйдэша охто. 17Чявэн Азгадоскирэн дуй баря триншэла дуйдэша дуй. 18Чявэн Адоникамоскирэн шовшэла шовдэша ефта.

19Чявэн Бигваёскирэн дуй баря шовдэша ефта. 20Чявэн Адиноскирэн Шовшэла пандждэша пандж. 21Чявэн Атероскирэн ко Езэкия, инядэша охто. 22Чявэн Хашумоскирэн триншэла дуйдэша охто.

23Чявэн Вецаёскирэн триншэла дуйдэша штар. 24Чявэн Харифоскирэн шэл дэшудуй. 25Чявэн Гаваоноскирэн инядэша пандж. 26Манушэн Вивлеемостыр и Нетофостыр шэл охтодэша охто.

27Манушэн Анафофскирэн шэл дуйдэша охто. 28Манушэн Бэф- Азмавефостыр саранда дуй. 29Манушэн Кириаф- Иаримостыр, Кефиростыр и Беерофостыр ефташэла саранда трин. 30Манушэн Рамостыр и Гевостыр шовшэла дуйдэша екх.

31Манушэн Михмасоскирэн шэл дуйдэша дуй. 32Манушэн Вефилёскирэн и Гаёскирэн шэл дуйдэша трин. 33Манушэн авиртонэ Невоскирэн пандждэша дуй. 34Чявэн авиртонэ Еламоскирэн бари дуйшэла пандждэша штар.

35Чявэн Харимоскирэн триншэла дуйдэша. 36Чявэн Иерихоноскирэн триншэла штардэша пандж. 37Чявэн Лодоскирэн, Хадидоскирэн и Оноскирэн ефташэла дуйдэша екх. 38Чявэн Сенаёскирэн трин барья иняшэла триндэша.

39Рашаенгирэн, чявэн Иедаиёскирэн кхэрэстыр Иисусоскирэсстыр, иняшэла охтодэша трин. 40Чявэн Иммероскирэн бари пандждэша дуй. 41Чявэн Пашхуроскирэн бари дуйшэла штардэша ефта. 42Чявэн Харимоскирэн бари дэшуефта.

43Левитэн, чявэн Иисусоскирэн и ко Кадмиило чявэндыр Годевоскирэн ефтадэша штар. 44Кай багэн, чявэн Асафоскирэн, шэл саранда охто. 45Кай ракхэн вудара, чявэн Шаллумоскирэн, чявэн Атероскирэн, чявэн Талмоноскирэн, чявэн Аккувоскирэн, чявэн Хатитоскирэн, чявэн Шоваёскирэн, шэл триндэша охто.

46Нефинеен: чявэ Цихоскирэ, чявэ Хасуфоскирэ, чявэ Таббофоскирэ, 47чявэ Кирососкирэ, чявэ Сиёскирэ, чявэ Фадоноскирэ, 48чявэ Леваноскирэ, чявэ Хагавоскирэ, чявэ Салмаёскирэ, 49чявэ Хананоскирэ, чявэ Гидделаскирэ, чявэ Гахароскирэ,

50Чявэ Реаиёскирэ, чявэ Рециноскирэ, чявэ Некодоскирэ, 51чявэ Газзамоскирэ, чявэ Уззоскирэ, чявэ Пасеахоскирэ, 52чявэ Весаёскирэ, чявэ Меунимоскирэ, чявэ Нефишсимоскирэ,

53чявэ Бакбукоскирэ, чявэ Хакуфоскирэ, чявэ Хархуроскирэ, 54чявэ Бацлифоскирэ, чявэ Мехидоскирэ, чявэ Харшоскирэ, 55чявэ Баркососкирэ, чявэ Сисароскирэ, чявэ Фамахоскирэ, 56чявэ Нециахоскирэ, чявэ Хатифоскирэ.

57Манушэн савэ кэрэнас буты кэ Соломоно: чявэ Сотаёскирэ, чявэ Соферефоскирэ, чявэ Феридоскирэ, 58чявэ Иаалоскирэ, чявэ Дарконоскирэ, чявэ Гидделоскирэ, 59чявэ Сафатиёскирэ, чявэ Хаттилоскирэ, чявэ Похереф-Гаццевайимоскирэ, чявэ Амоноскирэ. 60Сарэн нефинеен и чявэн савэ кэрэнас буты ко Соломоно триншэла инядэша дуй.

61Мануша явнэ Тел- Мелахостыр, Тел- Хашостыр, Херув- Аддоностыр, и Иммеростыр, тэ допхэнэн савэстыр ёнэ родостыр и кон лэнгирэ дада, чи Израилэстыр ёнэ. 62Чявэн Делаиёскирэн, чявэн Товиёскирэн, и чявэн Некодоскирэн — шовшэла саранда дуй. 63Рашаендыр: чявэ Ховайёскирэ, чявэ Гаккоцоскирэ, чявэ Верзелиёскирэ, саво лыя ромня ко Везеллиё Галаадянино чя и лыя тэ кхарэлпэ лэскирэ лавэса.

64Ёнэ родэнас пэскиро родо зачиндо до лыл нэ на попэнэ лэс. И лэн на гинэнас рашаенса. 65И пхэндя лэнгэ тиршафа, соб ёнэ тэ нахан свэнто хабэн саво исын ваш рашаенгэ, кэ дова сыр авэла рашай уримоса и туммимоса.

66Сарэн манушэн кэтанэ савэ рисинэ дэ Иудея саранда дуй барья трин шэла шовдэша, 67и бутярнэн муршэн и джювлен исыс — ефта барья триншэла трянда ефта, и кэ ёнэ исыс кон багэл муршэн и джювлен дуйшэла саранда пандж.

68Лэнгирэн грэн — ефташэла триндэша шов. Кхурорэн — дуйшэла саранда пандж. 69Верблюдэн — штаршэла триндэша пандж. Ослэн — шов барья ефташэла биш.

70И кой- савэ мануша шэралэ родоскирэ дынэ пэ адая буты. Тиршава дыя сувнакаса екх бари ловэнса, пандждэша чярэ, панджшэла трянда идя рашаенгэ. 71А кой- савэ шэралэ родондыр дынэ пэ Дэвлэскиро Кхэр пэ адая буты биш барья сувнакунэ ловэнса и дуй барья дуй шэла рупунэ ловэнса. 72Авирта мануша дынэ биш барья сувнакунэ ловэнса, и дуй барья рупунэ ловэнса, и шов дэша ефта идя рашаенгэ".

73И лынэ тэ дживэн рашая, и левиты, и кон ракхэл вудара, и кон багэл, и авир мануша, и нефинеи, и сарэ мануша Израилёскирэ дэ пэскирэ форы. И явья ефтато чён, и сарэ чявэ Израилёскирэ (исыс) дживэнас дэ пэскирэ форы .

81И скэдынэпэ сарэ мануша, сарэ сыр екх мануш, явнэ пэ площадь, сави исыс ангил Панытка Вудара. И пхэндэ ёнэ Ездраскэ сыклымарёскэ тэ янэл лыл дэ саво зачиндя Маисеё, сыр Яхвэ ракирэлас Израилёскэ. 2И яндя рашай Ездра лыл и откэрдя ангил сарэндэ, манушэндэ, муршэндэ и джювлендэ, дэ перво дэвэс ефтато чён. 3И ёв гинэлас адава лыл пэ площядь, сави исыс ангил Панытка вудара, ёв гинэлас утростыр кэ паш дэвэс, ангил муршэндэ и джювлендэ, и сарэ кон полэлас, и манушэнгирэ кана исыс обрисимэ тэ шунэн со чиндо до Законо.

4И тэрдо исыс Ездра по вучё каштуно штэто саво скэрдэ мануша пхалэндыр, и тэрдэ исыс паш лэстэ по право васт Маттфиё, и Шэмо, и Анаиё, и Уриё, и Хелхиё, и Маасеё, а по лево васт, Фадаиё, и Мисаило, и Малхиё, и Хашумо, и Хашбаддано, Захариё, Мешулламо. 5И откэрдя Ездра лыл ангил сарэндэ манушэндэ, пал адава со ёв исыс тэрдо вычедыр сарэндыр. И сыр ёв, откэрдя лыл тэнче сарэ мануша вштынэ.

6И тэнче Ездра прославиндя барэ Дэвлэс Яхвэ, и сарэ мануша ракирэнас: "Аминь Аминь", гадэнас пэскирэ васта упрэ. И Мангэнаспэ ёнэ и поклониндэпэ ангил Яхвэ кэ пхув. 7И Иисусо, и Ванаиё, и Шеревиё, и Иамино, Аккуво, Шавтаё, Годиё, Маасеё, Клито, Азариё, Иозавадо, Ханано, Фелаиё и левиты роспхэнэнас манушэнгэ Законо Маисеёско. И мануша исыс тэрдэ пэ пэскирэ штэты. 8И гинэнас ёнэ со исыс чиндо до лыл, Законо Дэвлэско и роспхэнэнас лэс адякэ, соб тэ полэн сарэ мануша.

9И пхэндя Неемия сарэ манушэнгэ, саво исыс тиршафоса, и рашай сыклымарё Ездра и левиты, савэ роспхэнэнас манушэнгэ: "Адава дэвэс — свэнто ваш амарэскэ Дэвлэскэ Яхвэ, на ровэн дадывэс". Ёв пхэндя адава, со сарэ мануша ровэнас сыр шунэнас, со исыс чинда до Законо. 10И пхэндя ёв лэнгэ: "Джянте, ханте тхулыпэн, и пьенте гудлыпэн, и бичявэнтэ хабэн одолэнгэ, конэстэ нанэ, со тэхан, пал одова, со свэнто адава дэвэс ваш амарэскэ Дэвлэскэ. И наровэнте пал одова со, лош сави дэл Яхвэ — адава исын зор тумари".

11И ливиты мангэнас манушэн тэ наровэн и ракирэнас: "Пирьячен пал адава, со дывэс дадывэс свэнто. И на ровэнте!" 12И гинэ сарэ мануша тэхан, и тэ пьен и тэ дэн авирэнгэ, и исыс мануша дэ бари лош, пал одова, со полынэ лава савэ лэнгэ роспхэнэнас.

13Пэ авир дэвэс шэралэ родоскирэ, рашая и левиты, скэдынэпэ кэ сыклымарё Ездра, соб тэ сыклён со зачиндо до Законо. 14Ёнэ прогиндэ до лыл со пхэндя Дэвэл вастэса Маисеевоскирэса, соб сарэ чявэ Израилёскирэ тэ дживэн дэ шатры по свэнко до ефтато чён 15и соб тэ ракирэн дэ сарэ форы Иерусалимоскирэ лава: "Джянте пэ бэрга и янэн кашта маслинатыр, и кашта авиртонэ маслинатыр, и кашта миртатыр, и кашта пальматыр, и авиртонэ каштэндыр, соб тэ кэрэн шатры сыр зачиндо".

16И гинэ мануша, и яндэ кашта, и скэрдэ шатры упрал пэ пэскирэ кхэра, и до гряды пэскирэ, и до гряды Дэвлэскиро Кхэрэско, и пэ площядь паш вудара Панытка, и пэ площядь Ефремовоски. 17И кэрдэ сарэ мануша савэ явнэ пленостыр шатры, и дживэнас дэ лэндэ. Адякэж сыр чявэ Израилёскирэ на кэрэнас адава, дэвэсэндыр Иисусоскирэндыр, саво исын чяво Навиноскиро, кэ адава дэвэс. И исыс бари лош кэ сарэ мануша.

18И ёв гинэлас лылэстыр Законо Дэвлэскиро дэвэс до дэвэс, саро курко. И ёнэ кэрэнас свэнко ефта дэвэс, а до охтото дэвэс — пролыджянас адава свэнко сыр исыс чиндо до лыл.

91А до бишта штарто дэвэс адалэско чёнэско, скэдынэпэ кхэтанэ чявэ Израилёскирэ исыс сарэ до посто, и уридэ дэ гонытко идя, и чивэнас пэ пэстэ прахо пхувьяко . 2И родо Израилёско отгия сарэндыр манушэндыр. Ёнэ вштынэ приджиндэпэ дэ пэскирэ бэзэха, и дякэж до налаче рынды пэскирэ дадэнгирэ.

3И тырдынэ сыс пэ екх штэто, и штарто котыр дэвэсэско гинэнас Законо Яхвэ, амарэ Дэвлэско, а тэнче приджинэнаспэ до бэзэха Дэвлэскэ, и поклонинэнаспэ Яхвэ, Дэвлэскэ пэскирэскэ. 4И тэрдынэ по вучё штэто левиты, Иисусо, Ваниё, Камиило, Шеваниё, Вунниё, Шеревиё, Ваниё, Хенано. И годлэнас барэ годласа ко Дэвэл пэскиро Яхвэ.

5И пхэндэ левиты Иисусо, и Кадмиило, Ваниё, Хашавниё, Шеревиё, Годиё, Шэваниё, Петахиё: "Вштэнте, благословляйте Яхвэ, тумарэс Дэвлэс, Саво исыс, исын и авэла! И мэк гадэн лав Тыро, саво вучедыр сарэстыр и барипэн Тыро нэнэ ни кэ кон! 6Ту — Яхвэ, Ту екх адасаво, Ту скэрдян болыбэн, и саро со до болыбэн и сарэн ангелен, и пхув и саро со пэ латэ, морё и саро со дэ лэстэ. И ту дэс сарэгэ джиипэн, и ангелы тукэ поклонинэнпэ.

7Ту — Яхвэ Дэвэл, Саво выкэдыян Аврамос и вылыджиян лэс Уростыр Халдейсконэстыр, и дыян лэскэ лав ‘ Авраам‘ , 8и попэян лэскиро ило чячунэса ангил Тутэ, скэрдян лэса завето, соб тэдэс пхув кай дживэнас хананеи, хеттеи, амореи, ферезеи, и иевусеи, и гергесеи, тэ дэс лэскирэ родоскэ, и Ту зрикирдян Пэскиро лав, пал адава со Ту чячуно.

9И Ту дыкхьян дэ саво пхарипэн исыс амарэ дада до Египто, и шундян сын годлэнас пашил морё Тростниково, 10и сыкадян Пэскири зор и васт пэ фараоностэ, и пэ сарэндэ бутярнэндэ лэскирэндэ, и пэ сари пхув лэскири, пал адава, со Ту джиндян сыр кэ амэ нанэ куч отлыджянаспэ, и Ту гадыян Пэскиро лав, адякэ сыр и дадывэс.

11И морё Ту роскэрдян ангил лэндэ, и ёне прогинэ морё пир шукипэн, а кон прасталас пал лэндэ, Ту тасадян лэн сыр бар до баро паны.

12И лыджясас Ту лэн дэвэсэса до столбо облочно и ратякэс до столбо ягатыр, саво сыкавэлас лэнгэ дром, пир саво ёнэ джянас. 13И пэ бэрга Синай сгиян Ту, и ракирэсас лэнса болыбнастыр, Ту дыян лэнгэ сэнды чячунэ, и законы сыр тэ дживэн, и лаче свэнта заповэди.

14И пал суббота свэнто Тыри Ту пхэндян лэнгэ, и заповеди, и Законо дыян Ту вастэса Маисеевоскирэса, слугаса Тырэса. 15И маро болыбнастыр дэсас лэнгэ тэ хан сыр ёнэ исыс бокхалэ, и паны барэстыр дыян лэнгэ сыр ёнэ закамнэ тэ пьен, и Ту пхэндян тэ джян тэ залэн пхув, пал сави Ту солахадян тэ дэс лэнгэ.

16Нэ амарэ дада исыс пхуткирдэ, и барунэ илэнса, и нэ шунэнас лава Тырэ. 17И на скамнэ тэ шунэн и тэ рипирэн, рынды савэ Ту кэрэсас ангил лэндэ, и ёнэ закэрдэ пэскирэ илэ, и выкэдынэ шэралэс, соб ёв тэ залыджял лэн до рабсто. Нэ ту — Дэвла простинэс, дэс лачипэн и милость, Тутэ баро вырикирибэн и чячуно камлыпэн, и Ту наачядян лэн.

18И сыр ёнэ кэрдэ пэскэ сувнакунэс гуровэс и пхэндэ: ‘ Адава дэвэл тыро, саво вылыджия тут Египтостыр‘ и дрыван холякирэнас Тут, 19нэ кэ Ту бари милость и Ту на ачядян лэн дэ пустыня. И столбо облочно на залэсас лэндыр дэвэсэ, соб тэ лыджял лэн пир дром, и столбо ягаса ратякэс, соб тэ сыкавэл, дром пир саво ёнэ тэ джян.

20И духо Тыро лачё дыян Ту, соб тэ сыклякирэс лэн, и манна Тыри на отлыян лэндыр, и паны дэсас лэнгэ, соб ёнэ тэ пьен. 21И саранда бэрш чялякирэсас Ту лэн дэ пустыня. И саро со трэби лэндэ исыс. Идя лэнгири на чинэлачпэ, и гэра лэнгирэ на шулёнас.

22И Ту дыян лэнгэ царсто и манушэн, и ёнэ залынэ пхув Сигоноскири, и пхув царёски Есевоноскири, и пхув Ого, царёскири Васаноскири.

23И Ту дыян лэнгэ чявэн дрыван бут, сыр чергэня до болыбэн, и Ту яндян лэн дэ пхув, пал сави Ту ракирдян лэнгирэ дадэнгэ, тэ залэн ла. 24И явнэ чявэ, и залынэ адая пхув, и Ту отдыян манушэн савэ дживэна одой, хананеен, и отдыян лэн и лэнгирэн царен и сарэн манушэн савэ исыс дэ одоя пхув, дэ лэнгирэ васта, соб ёнэ тэ кэрэн лэнса со камэн.

25И ёнэ залынэ зоралэ форы и пхув барвалы, и залынэ кхэра, пхэрдэ барвалыпнаса, выганавдэ ганынгэнса, виноградникэнса, и оливконэнса садэнса и авирэнса муритконэнса дэмбэнса. И ханас ёнэ и чялёнас и тхулёнас, и лэнгэ исыс куч чипнастыр.

26И ёнэ на кандэнас, и гадэнаспэ пэ Тутэ, обрисинэ думэса кэ законо Тыро, и умарэнас пророкэн Тырэн, савэ ракирэнас лэнгэ, соб ёнэ тэ порисён кэ Ту, и кэрэнас бари холы. 27И Ту отдэсас лэн до васта лэнгирэ врагэнгэ савэ кэрэнас лэнгэ дукх. И до пхарэ дэвэса ёнэ годлэнас кэ Ту, и Ту шунэсас лэн болыбнастыр, и пир Пэскири бари милость бичявэсас манушэн савэ зракхэнас лэн врагэндыр.

28И лэндэ исыс саро куч, ёнэ рисёнас тэ кэрэн бэзэх ангил Тырэ якха. И ту ачявэсас лэн до васта врагэнгирэ, савэ исыс хулаенса пэ лэндэ. И ёнэ порисёнас и годленас кэ Ту, и Ту шунэсас лэн болыбнастыр, и пир милость Тыри зракхэсас лэн бут молы. 29И ту ракирэсас лэнгэ, соб ёнэ тэ рисён ко Законо Тыро, нэ ёнэ пхирэнас пхуткирдыпнаса и на шунэнас заповеди Тырэ. Сэнды Тырэ на полэнас, – савэ Ту дыян тэ дживэл мануш. И ёнэ на кандэнас Тут, и на обмэкэнас пэскири мэн ангил Тутэ и на шунэнас Тут.

30И Ту вырикирэсас лэн бут бэрша и ракирэсас лэнгэ духоса Пэскирэса, бичявэсас пророкэн Тырэн, нэ ёнэ на кандэнас. И Ту отдэсас лэн до васта врагэнгэ авирэ пхувьятыр. 31И пир бари Тыри милость Ту на умардян лэн и наачядян лэн, пал одова, со Ту Дэвэл дрыван лачё, и милостиво.

32И акана, Дэвэл амаро, Дэвэл баро, зорало и савэстыр зджял дар, саво ракхэл Пэскиро лав и чячуно камлыпэн, мэк на сыкадёл ангил Тутэ, саро пхарипэн, саво пасия пэ амэндэ, пэ амарэндэ царендэ, пэ амарэндэ шэралэндэ, и пэ рашаендэ амарэндэ, и пэ пророкэндэ, и пэ дадэндэ амарэндэ, и пэ сарэндэ манушэндэ Тырэндэ, дэвэсэндыр сыр исыс царё дэ Ассирия кэ адава дэвэс. 33И Ту чячуно дэ саро, со кэрэлпэ амэнса, пал адава со чячибэн кэрэсас Ту, а амэ кэрасас бэзэх. 34Амарэ царя, и амарэ шэралэ, и амарэ рашая, и дада амарэ на кандэнас законо Тыро, и на пришунэнаспэ ко заповеди Тырэ, и ко лава Тырэ, савэ Ту ракирэсас лэнгэ.

35А ёнэ до царство пэскиро, до лачипэн Тыро саво дыян Ту лэнгэ, и дэ бари и барвалы пхув сави Ту дыян лэнгэ, на кандэнас и на отрисёнас пэскирэндыр захалэндыр рындэндыр.

36И амэ дадывэс бутярнэ, и пхув, сави дыян Ту амарэнгэ дадэнгэ, соб ёнэ тэ хан и тэ пьен латэр — амэ бутярнэ дэ латэ, 37и хабэн саво ёй дэл исын барвалыпэн важ царенгэ, савэн Ту чивдян пэ амэндэ пал амарэ бэзэха, тэ авэн хулаенса пэ амэндэ и пэ амаро хулаибэн. И амэ до баро пхарипэн.

38И пал- адава саро амэ доракираспэ пал чячунуно завэто и зачинас лэс до лыл, и чивас пэчять, амарэ шэралэ, амарэ левиты, и амарэ рашая".

101И по лыл печятьяса: Неемия, тиршафо, чяво Гахалиёско, и Седекия, 2Сераия, Азариё, Иеремия, 3Пашхуро, Амария, Малхия,

4Хаттушо, Шевания, Маллхо, 5Харимо, Меремофо, Овадия, 6Даниило, Гиннефоно, Варухо, 7Мешулламо, Авия, Миямино, 8Маазия, Вигая, Шемаия, ада рашая.

9левитэн: Иисусо, чяво Азаниёско, Бинуё чявэндыр Хенададоскирэндыр, Кадмило, 10и пшала лэнгирэ: Шевания, Годия, Клито, Фелаия, Ханано, 11Михо, Рехо, Хашавия, 12Закхуро, Шеревия, Шевания, 13Годия, Вания, Веникуя. 14Шэралэ манушэнгирэ: Парошо, Пахаф- Моаво, Еламо, Затто, Вания,

15Вануё, Азгаро, Беваё, 16Адония, Бигваё, Адино. 17Атеро, Езекия, Азуро, 18Годия, Хашумо, Бецаё, 19Харифо, Анафофо, Неваё, 20Магпиашо, Мешулламо, Хезиро, 21Мешезавело, Садоко, Иаддуё,

22Фелатия, Ханано, Анаия, 23Осия, Ханания, Хашшуво, 24Лохешо, Пилхо, Шошеко, 25Рехумо, Хашавно, Маасея, 26и Ахия, Ханано, Анано, 27Маллухо, Харимо, Ваано.

28И авирта мануша, рашая, левиты, кон ракхэл вудара, кон багэл, нефенеи и сарэ кон порисия кэ Дэвлэскиро Законо, лэнгирэ ромня, лэнгирэ чявэ, и чяя лэнгирэ, и сарэ кон джинэл и полэл, 29кхэтанэ пэскирэ пшалэнса, и барэ манушэнса, солахавдэ тэ пхирэн до Законо Дэвлэскиро, саво исыс дыно вастэса Маисеевоскирэса, слугаса Дэвлэскирэса, соб тэ ракхэн, и тэ дживэн пир заповеди Яхвэ, амарэ Дэвлэскирэ, и пир Лэскиро Лав сыр Ёв Пхэндя,

30и соб амэ тэ на оддас амарэн чяен манушэнгэ авиртонэ пхувьятыр и лэнгирэн чяен тэ на лас пал амарэндэ чявэндэ, 31а кэ мануша одолэ пхувьятыр, савэ янэн тэ бикнэн таваро и зёрно дэ суббота, тэ на кинэн кэ ёнэ дэ адава дэвэс, и довэс сыр исыс свэнко, и соб амэ тэ ачявас ефтато бэрш тэ на кэрас пэ маля, и тэ ачявас бангипэн.

32И сарэ амэ доракирдямпэ тэ дас пэстыр по штар граммы руп до бэрш до Кхэр амарэ Дэвлэскэ: 33по маро саво чивэн ангил Дэвлэстэ, пэ саро со янэн по жэртвенико до дэвэс, и саро со схачкирэн до дэвэс, по субботы, по нэво чён, пэ сарэ свэнки, и по свэнта рынды, и пэ жэртва пал бэзэх тэ авэл жужо Израилё, и пэ сари буты ваш Кхэр амарэ Дэвлэскиро.

34И чурдыям амэ жребиё рашая, левиты и мануша савэ авэна тэ янэл кашта дэ Дэвлэскиро Кхэр, конэскэ, савэ родоскэ и дэ саво дэвэс, тэ янэн кашта соб тэ хачёл яг бэрш бэршэстыр по жэртвэнико амарэ Дэвлэскиро Яхвэ, сыр чиндо до Законо, 35и соб тэ янэн перво плодо амарэ пхувьяко и перво плодо сарэндыр дэмбэндыр, бэрш пало бэрш, до Кхэр Яхвэ, 36и первонэн чявэн амарэн и скотостыр амарэстыр тэ янас сыр чиндо до Законо, и первонэн барэстыр и тыкнэстыр скотостыр тэ лыджяс ко рашая до Кхэр амарэ Дэвлэскэ.

37И перво маро амаро ласа тэ янас амэ, и плоды сарэндыр дэмбэндыр, вино и ксил, амэ ласа тэ янас рашаенгэ до Кхэр амарэ Дэвлэскэ, а дэшто котыр пхувьятыр амарятыт левитэнгэ оддаса. И левиты лена тэ прылэн дэшто котыр пхувьятыр дэ сарэ форы кай амэ кэрас буты. 38И авэла лэвитэнса, рашай чявэндыр Аароноскирэндыр, саво лэла тэ дыкхэл сыр левиты лэна тэ лэн дэшто котыр. И левиты янэна дэшто котыр пэскирэстыр котырэстыр до Кхэр амарэ Дэвлэскэ, до штэто кай саро ракхэлпэ.

39Пал одова со дэ адалэ штэты кай саро ракхэлпэ лэна тэ злыджян сарэ чявэ Израилёскирэ и чявэ Левиёскирэ сарэ плоды: зёрно, вино, и ксил. И одой свэнто посуда, и рашая, и кон ракхэл вудара, и кон багэл. И на ачкираса амэ Кхэр амарэ Дэвлэско.

111И дживэнас манушэнгирэ шэралэ до Иерусалимо, а авир мануша чурдэнас жрэбиё, соб тэ выкэдэн екхэс дэшэндыр кон авэла тэ дживэл до свэнто форо Иерусалимо, а еня котыра аченаспэ дэ авир форы. 2И дыя дэвэл бахт одолэнгэ манушэнгэ, савэ кокорэ закамнэ тэ дживэн до Иерусалимо.

3И гэна шэралэ фороскирэ, савэ дживэнас до Иерусалимо, а до форы Иудейска дживэнас сарэ дэ пэскирэ кхэра: Израильтяни, рашая, и левиты, и нефинеи, и чявэ манушэнгирэ савэ исыс бутярнэнса ко Соломоно. 4Кой- савэ чявэ Иудаскирэ и Вениаминоскирэ дживэнас до Иерусалимо. Чявэндыр Иудаскирэндыр: Афаия, чяво Уззиоско, чяво Захариёско, чяво Амариоско, чяво Сафатиёско, чяво Малелеилоско, чявэндыр Фаресоскирэндыр,

5и Маасия, чяво Варухоско, чяво Колхозеёско, чяво Хазаиёско, чяво Адаиёско, чяво Иоиаривоско, чяво Захариёско, чяво Шилониёско. 6Сарэн чявэн Фаресоскирэн, савэ дживэнас до Иерусалимо, штаршэла шовдэша охто, сарэ барэ мурша.

7Чявэ Вениаминоскирэ: Саллуно, чяво Мешулламоско, чяво Иоедоско, чяво Федаиёско, чяво Колаиёско, чяво Маасеёско, чяво Ифиилоско, чяво Исаиёско, 8и пал лэстэ Габбаё, и Саллаё — еняшэла дуйдэша охто. 9И Иоилё, чяво Захариёско, ёв исыс шэралеса пэ лэндэ, а Иуда, чяво Сенуёско исыс — авирто мануш до форо.

10Рашаендыр: Иедаиё, чяво Иоиаривоско, Иахино, 11Сераиё, чяво Хелкиёско, чяво Мешулламоско, чяво Садокоско, чяво Ахитувоско, шэрало до Кхэр Дэвлэско, 12и пшала лэнгирэ, кэрэнас буты ваш Дэвлэско Кхэр — охтошэла дуйдэша дуй, и Адаиё, чяво Иерохамоско, чяво Фелалиёско, чяво Амциёско, чяво Захариёско, чяво Пашхуроско, чяво Малхиёско,

13и пшала лэскирэ, шэралэ родоскирэ — дуйшэла саранда дуй; и Амашсаё, чяво Азариилоско, чяво Ахзаёско, чяво Мешиллемофоско, чяво Имероско, 14и пшала лэскирэ, чявэ барэ мурша — шэл биш охто. А шэрало лэнгиро исыс Завдиило, чяво Гагедолимоско.

15И левитэндыр: Шемаиё, чяво Хашшувоско, чяво Азрикамоско, чяво Хашавиёско, чяво Вунниёско, 16и Шавфаё, и Иозавадо, шэралэ левитэнгирэ, пэ буты сави пал Кхэр Дэвлэско;

17Матфаниё, чяво Михоско, чяво Завдиёско, чяво Асафоско, шэрало саво гадэлас Дэвлэскиро лав до мангипэн, и Бакбукиё, авир пшал лэскиро, и Авдо, чяво Шаммуёско, чяво Галалоско, чяво Идифуноско. 18Сарэн левитэн до свэнто форо — дуйшэла охтодэша штар.

19И кон ракхэл вудара: Аккуво, Талмоно, и пшала лэнгирэ, савэ ракхэн вудара, — шэл ефтодэша дуй. 20И ачнэпэ Израильтяни, рашая, левиты, — дэ сарэ форы Иудаскирэ, пэ пэскири пхув. 21А нефинеи дживэнас до Офелё, и Цихо и Гишфо сыс лэнгирэ шэралэ.

22И шэралэса левитэнгирэса до Иерусалимо исыс Уззиё, чяво Ваниёско, чяво Хашавиоско, чяво Матфаниёско, чяво Михоско, чявэндыр Асафоскирэндыр, багэнас до Кхэр Дэвлэско, 23и царё припхэндя, соб одолэнгэ кон багэл тэ дэн саро со трэби дэвэс до дэвэс. 24Петахиё, чяво Мешезавелоско, чявэндыр Зараскирэндыр, чявэско Иудаско, ёв исыс ко царё пир сарэ рынды израильсконэ манушэндэ.

25И до гава пэ маля чявэндыр Иудаскирэндыр дживэнас до Кириаф- Арба и пашил форы лакирэ, и дэ Дивона и пашил форы лакирэ, и до Иекавцеилё и до гава лэскирэ, 26и дэ Иешуё, и дэ Моладо и дэ Беф- Палето, 27и дэ Хацар- Шуало, и дэ Вирсавия и пашил форы лакирэ.

28и дэ Секелага, и до Мехоно и пашил форы лэнгирэ, 29и дэ Ен- Риммона, и дэ Цора, и дэ Иармуфа, 30Заноаха, Одоллама и гава лэнгирэ, Лахисо и маля лэскирэ, Азека и пашил форы лакирэ. И дживэнас ёнэ Вирсавиятыр кэ штэто Енномо. 31И чявэ Вениаминоскирэ Геватыр, кэ Михмаса, и дэ Гаё, и Вефилё и пашил форы лэгирэ, 32Анафофа, Нова, Анания, 33Гацора, Рама, Гиффаима, 34Хадида, Цевоима, Неваллата, 35Лода, и Она, штэто Харашимо. 36Кэ кой- савэ лэвиты исыс пувья дэ Иудея кэ Вениамино.

121И гэна рашая и левиты, савэ явнэ Зоровавелёса, чявэса Салафиилосккирэса, и Иисусоса: Сераиё, Иеремия, Ездра, 2Амария, Маллухо, Хаттушо, 3Шехания, Рехумо, Меремофо,

4Иддо, Гиннефоё, Авиё, 5Миямино, Маадиё, Вилго, 6Шемаиё, и Иоиариво, Иедаиё, 7Салло, Амоко, Хелкиё, Иедаиё. Ада шэралё рашаенгирэ и пшала лэнгирэ до дэвэса Иисусоскирэ.

8И левиты: Иисусо, Биннуё, Кадмиило, Иуда, Матфания, ёв и пшала лэскирэ исыс шэрало пир гиля Дэвлэскэ. 9И Бакбукиё, и Унниё, пшала лэнгирэ, исыс тэрдэ пашил лэндэ и исыс шэралэса по хоро саво багалас.

10И Исусо дад Иокимоско, и Иокимо дад Елияшивоско, и Елияшиво — Иоиада, 11и Иоиадо дад Ионафаноско, и Ионафано дао Иаддуёско.

12До дэвэса Иокимоскирэ исыс рашая, шэралэ родоскирэ: Сераиёстыр — Мераиё, Иеремиёстыр — Хананиё, 13Ездрастыр — Мешулламо, Амариёстыр — Иоханано, 14Мелухостыр — Ионафано, Шеваниёстыр — Иосифо,

15Харимостыр — Адно, Мераиофостыр — Хелкия, 16Иддостыр — Захария, Гиннефоностыр — Мешулламо, 17Авиёстыр — Зихриё, Миниаминостыр. Моадиёстыр — Пилтаё, 18Вилгостыр — Шаммуё, Шемаиёстыр — Ионафано, и 19Иоиаривостыр — Мафнаё, Иедаиёстыр — Уззиё, 20Саллаёстыр — Каллаё, Амокостыр — Еверо, 21Хелкиёстыр — Хашавия, Иедаиёстыр — Нафанаило.

22Левиты до дэвэса Елияшивоскирэ, Иоиадоскирэ, и Иохананоскирэ, и Иаддуёскирэ исыс зачиндэ шэралэнса родоскирэнса, и рашая сыр исыс царё дэ персия Дария. 23Чявэ Левиёскирэ, шэралэ родоскирэ, исыс зачиндэ до лыл саво лыджяласпэ до долэ дэвэса, и ко дэвэса Иохананоскирэ, саво исын чяво Елиашивоско.

24И шэралэ левитэнгирэ: Хашавиё, Шеревиё, и Иисусо, чяво Кадмиилоско, и пшала лэнгирэ тэрдынэ муй ко муй и лынэ тэ шарэн, и тэ пхэнэн наис, пир заповэдь Давидоскирэ, саво исын Дэлэскиро мануш ёнэ славиндэ Дэвлэс екх пал екхэстэ. 25Матфаниё и Бакбукиё, Овадиё, Мешулламо, Талмоно, Аккуво — исыс тэрдэ тэ ракхэн вудара. 26Ёнэ исыс до дэвэса Иоакимоскирэ, савэ исын чяво Иисусоско, чявэско Иоседекоско, и до дэвэса Неемиёскирэ, саво исыс шэрало пир форы, а Ездра исыс, рашаса и сыклымарёса.

27Сыр явья дэвэс тэ свэнцынэ стена до Иерусалимо кхардэ левитэн сарэндыр штэтэндыр, соб тэ явэн до Иерусалимо, и тэ кэрэн свэнцымо лошаса, и бахталэ илэса, гилэнса, кимвалэнса, арфэнса, и лирэнса. 28И скэдынэпэ чявэ свэ багэн Иерусалимостыр и гавэндыр Нетофафоскирэндыр,

29и Беф- Гаггилглостыр, и малендыр Гевоскирэндыр и Азмаветоскирэндыр, пал одова со чявэ савэ багэн кэрдэ кхэра до гава пашил Иерусалимо. 30И жужакирдэпэ рашая и левиты, и жужакирдэ манушэн и вудара, и стена фороски.

31Имэ скэдыём Иудейсконэн шэралэн упрэ пэ стена, и чивдём дуй барэ хоры тэ гадэн Дэвлэскири слава, и тэ джян пир стена пир право васт кэ Навозна вудара.

32И гия пал лэндэ Гошаиё и паш шэралэ Иудейка, 33и Азария, Ездра, и Мешулламо, 34Иуда, и Вениамино, И Шемаиё, Иеримия, 35и чявэ рашаегирэ, баганас до трубы: Захария, чяво Ионафоноско, чяво Шемаиёско, чяво Матфаниёско, чяво Михеёско, чяво Закхуроско, чяво Асафоско,

36и пшала лэскирэ — Шемаиё, и Азариило, Миллалаё, Гилалаё, Мааё, Нафанаило, и Иуда, Хананиё и багэнас по инструменты гиля Давидоскирэ, саво исын мануш Дэвлэскиро, и Ездра, сыклымарё, джялас ангил амэндэ, 37пашил вудара Источникоскирэ гадыямнэ упрэ до форо Давидоскиро, ко вудара Панытка.

38И авирто хоро саво гадэлас Дэвлэскири слава, и джялас по лево васт, и мэ пал лэндэ, и паш мануша манса, пир стена башнятыр Бовэскирьятыр кэ стена буглы, 39и вударэндыр Ефримоскирэндыр, и пашил вудара пуранэ, и пашил вудара Мачитка и пашил башня Хананелоски, и башня Меаоскири, и ко вудара Бакрытка, и тэрдынэ ёнэ пашил вудара Темнична савэ лыджян ко дворо Дэвлэскиро.

40И тэрдынэ пашил Кхэр Дэвлэскиро сарэ дуй хоры и гадэнас слава Дэвлэскэ, мэ и бут шэралэ манса, 41и рашая: Елиакимо, Маасеё, Миниамино, Михеё, Елиоенаё, Захариё, Хананиё, трубэнса, 42и Маасеё, и Шемаиё, и Елиазаро, и Иззиё, и Иоханано, и Малхиё, и Еламо, и Езеро. И багэнас, а Израхиё исыс лэнгиро шэрало.

43И янэнас ёнэ до одова дэвэс бут жэтвы и исыс лошалэ, пал одова, со Дэвэл дыя лэнгэ бари лош. Дякэж джювля и чяворэ исыс лошалэ, и исыс дур шунды лош сави исыс до Иерусалимо.

44И до одова дэвэс выкэдынэ манушэн савэ лэна тэ дыкхэн пал штэты кай ракхэнпэ ловэ, хабэн, зёрно, и дэшто котыр, саво мануша янэнас пэскирэндыр малендыр савэ исыс пашил форо, сыр зачиндо до Законо ваш рашаенгэ и ливитэнгэ. Пал одова, со мануша Иудейска исыс лошалэ пал рынды савэ кэрэнас рашая и левиты. 45И лыджянас служба пэскирэ Дэвлэскэ и жужакирэнаспэ ангил Лэстэ, и одолэ кон багэл, и кон ракхэл вудара, кэрэнас пэскиро рындо, дякэ сыр пхэндя Давидо, и Соломоно чяво лэскиро.

46Дякэ сыр до дэвэса Давидоскирэ и Асафоскирэ гара исыс чивдэ шэралэ пэ одолэдэ кон багэл, и гиля савэ гадэн Дэвлэскиро лав. 47И саро Израилё до дэвэса Зоровавелёскирэ и до дэвэса Неемиёскирэ лыджянас дэвэс до дэвэс котыр одолэнгэ кон багэл и кон ракхэл вудара дякэж лыджянас свэнцымо левитэнгэ, а левиты лыджянас свэнцымо чявэнгэ Аароноскирэнгэ.

131И до одова дэвэс гинэнас лыл Маисеёско, и уджиндэ со зачиндо дэ лэстэ, со аммонитянино и моавитянино на авэна ни коли Дэвлэскирэнса манушэнса, 2пал одова со сыр дыкхнэ манушэн Израилёскирэн на прылынэ лэн марэса и панеса, и бичявдэ пэ лэндэ Вааламос, соб ёв тэ проклининэл лэн, нэ Дэвэл амаро обрискирдя лэнгиро проклёно пэ бахт. 3И сыр шундэ ёнэ адава законо, тенчэ вытрадынэ сарэн манушэн кон авиртонэ пхувьятыр.

4Ангил далэстэ рашай Елияшиво, лэс чивдэ тэ дыкхэл пал комноты дэ амарэ Дэвлэскиро Кхэр, и ёв исыс пэскиро Товиёскэ. 5И ёв отдыя Товиёскэ бари комнота, дэ сави кэ адава счивэнас саро со мануша жэртвовали, фимиамо, посуда, дэшто котыр зёрностыр, вино и ксил, сыр исыс пхэндо до законо ваш левитэнгэ, ваш одолэнгэ кон багэл, и кон ракхэл вудара, и одой исыс пашло со янэнас ваш рашаенгэ.

6И сыр адава кэрдяпэ мэ на исыс до Иерусалимо, пал одова со до трянда дуйто бэрш сыр Артаксерксо исыс царё Вавилонско, явьём мэ ко царё, и сыр прогинэ дэвэса мэ отмангьёмпэ царёстыр тэ джяв палэ. 7И мэ явьём до Иерусалимо и галыём налачё рындо, саво кэрдя Елияшиво ваш Товиёскэ, сыр дыя лэскэ комната дэ Дэвлэскиро Кхэр.

8И исыс мангэ дрыван пхаро, и мэ по вычурдыём сарэ Товиёскирэ шматы аври. 9Имэ мэ пхэндём, соб ёнэ тэ жужакирэн комнаты, и ёнэ жужакирдэ и мэ рискирдём одорик посуда Дэвлэскирэ Кхэрэскири, и саро со жэртвовали мануша и фимиамо.

10И уджиндём мэ, со котыр левитэнгиро на выдэласпэ, и левиты и кон багэл и кон кэрэлас пэскири буты сарэ роспрастандынэ пир пэскирэ маля. 11И мэ выпхэндям шэралэнгэ: "Соскэ ачкирдо Дэвлэскиро Кхэр?" И мэ скэдыём и чивдём лэн пэ лэнгирэ штэты.

12И сарэ Иудейска мануша яндэ дэшто котыр зёрно, и вино, и ксил до штэто кай саро ракхэлпэ. 13И мэ чивдём пэ адалэ штэты рашас Шелемиёс, и сыклымарёс Садокос, и Федаиёс левитэндыр, и пашил лэндэ Хананос, чявэс Закхуроскирэс, чявэс Матфаниёскирэс, пал одова со лэн гинэнас чячунэнса. И пэ лэндэ исыс чивдо тэ роздэн пэскирэнгэ пшалэнгэ. 14Зрипир мангэ, Дэвла и нахаскир мирэ лаче рынды, савэ кэрдём мэ ваш миро Дэвлэско Кхэр и ваш служэние дэ лэстэ.

15До одолэ дэвэса дыкхьём мэ дэ Иудея манушэн савэ кэрэнас буты дэ суббота, кон лыджялас снопы, кон лыджялас пэ ослэндэ вино, винаградо, мури, и саро авирто со янэнас до Иерусалимо, дэ субботнё дэвэс, и мэ ракиравас лэнгэ до одоваж дэвэс, сыр ёнэ бикнэнас адава хабэн.

16И одой дживэнас мануша форостыр Тиро савэ янэнас мачен и авир таваро и бикнэнас дэ суббота Иудиенгэ, и дэ Иеруслимо. 17И мэ выпхэндём барэ манушэнгэ Иудеенгэ: "Со ада за налачё рындо, саво тумэ кэрэн и на гинэн субботнё дэвэс? 18Хиба нанэ адякэ кэрэнас тумарэ дада, и бичявдя Дэвэл амаро пэ амэндэ баро пхарипэн и пэ саро форо? А тумэ прыкхарэн холы по Израилё, со на гинэн суббота".

19И исыс: сыр явья бэвэль ангил суббота, мэ пхэндём, вудара Иерусалимоскирэ тэ закэрэн и тэ на откэрэн, кэ одова сыр на проджяла суббота. И чивавас мэ бутярнэн мирэн пашил вудара, соб тэ напролыджян нисаво товаро дэ суббота. 20И раткирэнас сарэ бикнэбнаря пал форо Иерусалимо екх чи дуй молы.

21И ракиравас мэ лэнгэ: "Соскэ тумэ раткирэн пашил стена? Сыр дыкхава тумэн авирто моло, тэнче мэ чивава пэ тумэндэ миро васт. Одолэстыр молостыр ёнэ на явэнас дэ суббота". 22И мэ пхэндём левитэнгэ, сыб ёнэ тэ жужакирэнпэ и тэ явэн тэ ракхэн вудара, соб тэ свэнтынэн суббота. И адава зрипир мангэ, Дэвэл миро, и заракх ман пир камлыпэн Тыро баро.

23А дякэж мэ дыкхьё иудеен, савэ лынэ пал пэстэ ромнен азотянконэн, аммонитянконэн, моавитянконэн, 24и чявэ лэнгирэ по паш ракирэнас пир чиб азотско и на джинэнас тэ ракирэн пир чиб иудейско.

25И мэ ракиравас лэнгэ, клининдём лэн, и вариконэс муршэндыр маравас, и чинавас пэ лэндэ бала, и припхэнавас лэнгэ тэ солахан ангил Дэвлэстэ: "На отдэнте чяен тумарэн пал лэнгирэ чявэндэ и налэнте ромнен чявэнгэ тумарэнгэ и пэскэ чяендыр лэнгирэндыр". 26Хиба нанэ адалэса кэрэлас бэзэх Соломоно царё Израилёско? И адасавэс царёс сыр ёв на исыс ни кэ савэ мануша, и камлыпэн Дэвлэскиро исыс пэ лэстэ, и дыя лэскэ Дэвэл тэ авэл царёса пир саро Израилё. И ёв на вытэрдыя ангил ромнендэ авирэ пхувьятыр и ёнэ залыджинэ лэс до бэзэх. 27И амэ на ласа тэ шунас тумэн, и тэ кэрас адава баро бэзэх, и тэ авас нанэ чячунэ ангил Дэвлэстэ, и на ласа тэ лас ромнен авирэ пхувьендыр.

28И екх чявэндыр Иоиадоско, чяво барэ рашаско Елияшивоско, исыс джямутро Санаваллатоскэ, Хоронитоскэ. И мэ вытрадыём лэс пэстыр. 29Зрипир лэнгэ, Дэвэл миро, со ёнэ на гинэнас свэнтымос и завето рашаенго и левитэнго.

30И жужакирдём мэ лэн сарэстыр со явья авирэ пхувьятыр, и чивдём ваш рашаенгэ и ваш левитэнгэ кон пал конэстэ авэла тэ лыджял пэскиро рындо, 31и дэсаво дэвэс тэ янэн кашта, и перва плоды. Зрипир мангэ, Дэвэл миро, пэ бахт.